បន្ទាយមានជ័យ៖ រដ្ឋលេខាធិការក្រសួងសុខាភិបាល លោកស្រី ឱ វណ្ណឌីន បានលើកឡើងថា តួនាទីរបស់គ្រូពេទ្យសំខាន់បំផុត «ការជួយសង្គ្រោះអាយុជីវិតរបស់មនុស្ស» ដោយមិនទាមទារលក្ខខណ្ឌអ្វីទាំងអស់ ដេីម្បីចូលរួមលើកកម្ពស់ការផ្តល់សេវាសុខភាពជូនដល់ប្រជាពលរដ្ឋ ត្រូវបង្ខិតការផ្ដល់សេវាសុខាភិបាលឱ្យទៅកៀកនិងប្រជាពលរដ្ឋ។
លោកស្រី ឱ វណ្ណឌីន បានលេីកឡេីងដូចនេះ នៅក្នុងកិច្ចប្រជុំពង្រឹងការផ្តល់សេវាថ្នាក់មណ្ឌលសុខភាព និងការអនុវត្តអំពីក្របខ័ណ្ឌអនុវត្តការ ជំរុញបង្កើនថែទាំសុខភាពបឋម នៅខេត្តបន្ទាយមានជ័យ នាថ្ងៃទី០៩ ខែឧសភា ឆ្នាំ២០២៤។
ជាមួយគ្នានោះលោកស្រី ក៏បានណែនាំដល់មន្ត្រីសុខាភិបាល មណ្ឌលសុខភាព ដែលគ្រប់ដណ្តប់ប្រជាពលរដ្ឋ ត្រូវធ្វេីការក្តាប់ឱ្យបានចំនួនប្រជាជន ជាពិសេសស្រ្តីមានផ្ទៃពោះ អ្នកមានជំងឺលេីសឈាម ទឹកនោមផ្អែម និងជំងឺផ្សេងៗ ត្រូវដឹងឱ្យច្បាស់ពីស្ថានភាពរបស់ពួកគាត់ និងត្រូវបង្កេីតនៅបណ្តាញទំនាក់ទំនងនៅមូលដ្ឋានឱ្យបានល្អនៅក្នុងសហគមន៍។
លោកស្រីបញ្ជាក់ទៀតថា មន្ត្រីសុខាភិបាល ក្រុមគ្រូពេទ្យ ត្រូវប្រកបការងារដោយវិជ្ជាជីវៈ និងក្រមសីលធម៌ មិនត្រូវមានការប្រើពាក្យពេចន៍ឱ្យបានសមរម្យចំពោះអ្នកជំងឺឡេីយ។
ក្នុងឱកាសនោះដែរ តាមការបញ្ជាក់ពីលោកវេជ្ជបណ្ឌិត ឡេ ច័ន្ទសង្វាត ប្រធានមន្ទីរសុខាភិបាល នៃរដ្ឋបាលខេត្តបន្ទាយមានជ័យ ឱ្យដឹងថា មន្ទីរនៅតែបន្តកិច្ចសហការយ៉ាងជិតស្និទ្ធជាមួយមន្ទីរ សុខាភិបាលខេត្តស្រះកែវ តាមរយៈការងារទប់ស្កាត់ជំងឺឆ្លង ការបណ្តុះបណ្តាល ការងារចងសម្ព័ន្ធ មេត្រី និងកិច្ចសហប្រតិបត្តិការ មន្ទីរពេទ្យបង្អែកខេត្តមិត្តភាពកម្ពុជា-ជប៉ុនមង្គលបូរី, មន្ទីរពេទ្យ បង្អែកប៉ោយប៉ែត ជាមួយមន្ទីរពេទ្យបង្អែកស្រុកអារញ្ញប្រាថេត និងមន្ទីរពេទ្យមួយចំនួនទៀត។
លោកវេជ្ជបណ្ឌិត ឱ្យដឹងទៀតថា ភាគីទាំងពីរតែងជួបប្រជុំពិភាក្សាទ្វេភាគី លើកិច្ចសហប្រតិបត្តិការផ្សេងៗទៀត ដើម្បីផ្លាស់ប្តូរ បទពិសោធន៍, ពង្រឹងសមត្ថភាពជំនាញ និងការរឹតចំណងសាមគ្គីភាព សហភាតរៈ និងកិច្ចសហ ប្រតិបត្តិការក្នុងនាមជាប្រទេសជាប់របងភូមិផងជាមួយ ដែលកិច្ចការងារនេះ យើងធ្វើបានល្អប្រសើរ៕
